निरंजन साह, जनकपुरधाम
जनकपुरधाम, चैत्र २६ गते । जनकपुरमा छुरा प्रहार गरि एक युवकको हत्या भएको छ ।

सोमबार दिउँसो जनकपुरधाम उपमहानगरपालिका वडा नम्बर –४ स्थित विश्वकर्मा चोकमा २० वर्षीय प्रीन्स महासेठको छुरा प्रहार गरी हत्या भएको धनुषा प्रहरी प्रवक्ता रञ्जन अवाले बताए ।

जिल्ला प्रहरी कार्यालय धनुषाका डिएसपी रञ्जन अवाका अनुसार विश्वकर्मा चोकमा तीन÷चार जनाको एक समूहबिच झगडा हुँदा महोत्तरीको एकडारा गाउ पालिका वडा नम्बर ३ भटौलीया निवासी घर भएका प्रीन्समाथि छुरा प्रहार भएको थियो।
गाउँको सम्पत्ति बेचेर उनको परिवार जनकपुर बस्दै आएको थियो । बुवा जमाहिर लाल महासेठको कोरोना कालमा मृत्यु पश्चात आमा ले फलफूल व्यबसाय गरी बालबच्चा को पालन पोषण गर्दै आएकी थिइन ।

प्रीन्सलाई उपचारका लागि लैजाँदै गर्दा मृत्यु भएको प्रवक्ता अवाले बताए । स्थानीयका अनुसार छुरा प्रहारबाट गम्भीर घाइते प्रीन्स त्यहाँबाट भाग्दै गर्दा बाटोमा लडी बेहोस भएको थियो ।
सोही अवस्थामा स्थानीय र प्रहरीले प्रीन्सलाइ उद्धार गरि प्रादेशिक अस्पताल जनकपुरधाममा लैजाँदै गर्दा बाटोमै मृत्यु भएको छ।
घटनामा संलग्न रहेको आरोपमा प्रहरीले दुई जनालाई नियन्त्रणमा लिएको छ। जनकपुरधामको शान्तिनगर बस्ने रोशन दास र अर्का ठेगाना खुल्न नसकेको अर्जुन साहलाई अनुसन्धानको लागि पक्राउगरेको प्रवक्ता अवाले बताए ।
मृतक युवकको शव पोस्टमार्टमका लागि प्रादेशिक अस्पताल जनकपुरमा राखिएको र घटना विषयमा थप अनुसन्धान गरिरहेको जिल्ला प्रहरी कार्यालय धनुषाले जनाएको छ ।