प्रिंन्स मिश्रा, कपिलवस्तु
कपिलवस्तु, जेष्ठ १८ गते ।छिमेकी चराको गणना सुरु भएको छ । जेठ १८ गतेदेखि ञछिमेकी चरा’ एप्लीकेशनको मार्फतबाट जो सुकैले पनि आफ्नो घर टोलमा देखिएका चराको गणना गर्न सकिने छ ।

नेपाल पन्छी संरक्षण संघका फिल्ड बायोलोजिस्ट दिलीप चन्दले गणना गर्ने ‘छिमेकी चरा’ को एप्लिकेशनको प्रयोग गरी जो सुकैले गणनामा सहभागी हुन सक्ने बताए । उनका अनुसार एप डाउनलोड गर्नुपर्ने हुन्छ । जसमा नेपालमा पाइने चराहरूको चित्र र विशेषता उल्लेख गरिएको छ ।

घर वरपर देखिएका चराको चित्र हेरी पहिचान गर्न सकिने छ । गणना गरेको चराको विवरण एपको माध्यमबाट पठाउनुपर्ने छ । चरा गणना गर्दा मोबाइलको लोकेशन अन गरी जिल्ला छान्नुपर्ने बताइएको छ । छिमेकी चराको गणना यहि जेठ २५ गतेसम्म संघको आयोजनामा सञ्चालन हुने जनाइएको छ । मानव बस्ती आसपासमा आउने दूरबिन बिना पहिचान गर्न सकिने एक सय बढी प्रजातिसहित अन्य चराको गणना गरिने फिल्ड बायोलोजिस्ट चन्दले बताए ।

“चरा अवलोकनमा चासो दिने देशभरमा सानो समुदाय रहेको छ । यसलाई बिस्तार गर्न जरुरी छ ।“ छिमेकी चरा कार्यक्रमका अधिकृत आरती नेपालीले भनिन् । उनका अनुसार नागरिकहरू छिमेकी चरा गणनामा सहभागी हुँदा चरा प्रतिको प्रेम बढ्दै जाने छ । चराको रहनसहन समेत थाहा हुने छ । समुदायमा रहेका चराको अवस्था समेत थाहा हुने छ ।’ सन २०२२ देखि छिमेकी चराको गणना गर्न सुरु भएको संघका कार्यक्रम अधिकृत भूपाल नेपालीले बताए ।

जाडो याम र गर्मी याममा वर्षमा दुई पटक गणना हुने उनले जनाए । स्थानीय जनताको सहभागिता गराउन हरेक जिल्लामा स्वमसेवकको व्यवस्था गरिएको भूपालको भनाइ छ । ती स्वयंसेवकले समुदायमा पुगेर चराको विषयमा जानकारी दिने, पहिचान गर्न र एप्लीकेशनबाट गणना गर्न सिकाउने जनाइएको छ । आफ्नो घर, छत, सडक, पार्क लगायतका स्थानमा देखिएका चराको गणना हुने छ । गणना गर्ने स्थानमा कम्तीमा १५ देखि ३० मिनेटमा देखिने चराको रेकर्ड राखी सहयोग गर्न संघले अनुरोध गरेको छ ।