बर्दियाका‘मधेशी र थारुले सुरक्षाको माग गर्दा उल्टै गोली खानुपर्ने स्थिति’ तमलोपा


कमल साह
जनकपुरधाम, २५ जेठ । तराई मधेश लोकतान्त्रिक पार्टीले बर्दियामा गोली प्रहार गरी किशोरी नविना थारुको हत्या गरेको भन्दै सुरक्षाकर्मीमाथि कारबाहीको माग गरेको छ ।

तमलोपाले मंगलबार विज्ञप्ति जारी गरी बर्दियाको मधुवन नगरापलिका–२ ओराली बजारमा हिंस्रक वन्यजन्तुबाट सुरक्षालागि भएको प्रदर्शनका क्रममा प्रहरीले नविना थारुको हत्या गरेको ठहर गर्दै यस्तो माग गरेको हो ।

तमलोपाले मधेशी र थारु जनताले सुरक्षाको माग गर्दा उल्टै गोली खाएर मृत्युवरण गर्नुपर्ने अवस्थाको अन्त्य हुन नसकेको कुरा यो घटनाबाट पुनः प्रमाणित भएको पनि बताएको छ ।

पार्टीका अध्यक्ष विषेशचन्द्र लालद्वारा जारी विज्ञप्तिमा भनिएको छ, ‘सरकार र प्रहरीको मानसिकता पुनः एकपटक जनसमक्ष आएको छ । मधेशी र थारु जनतालाई सुरक्षा जस्तो अनिवार्य र न्यायोचित अधिकारको सुनिश्चितताको माग गर्दैसम्म अधिकार नभएको र यसो गर्दा सीधै गोली खाने स्थिति रहेको यस घटनाबाट पुनः प्रमाणित भएको छ ।’

27 दिन पहिले    92 Post Views